𐴑𐴟𐴃𐴤𐴟𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴡𐴦𐴙𐴕 𐴊𐴤𐴡𐴌𐴥𐴞 𐴷𐴰𐴰 𐴒𐴤𐴡𐴌 𐴓𐴟𐴏𐴧𐴝𐴕 𐴀𐴥𐴡𐴘 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴧𐴡𐴥𐴘 𐴱𐴹 𐴎𐴡𐴕 𐴎𐴡𐴈𐴡𐴥𐴔 𐴉𐴝𐴘𐴧𐴠𐴥𐴱𐴱

 𐴑𐴟𐴃𐴤𐴟𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴦𐴡𐴙𐴕 𐴊𐴤𐴡𐴌𐴥𐴞 𐴷𐴰𐴰 𐴒𐴤𐴡𐴌 𐴓𐴟𐴏𐴧𐴝𐴕 𐴀𐴥𐴡𐴘 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴧𐴡𐴥𐴘 𐴱𐴹 𐴎𐴡𐴕 𐴎𐴡𐴈𐴡𐴥𐴔 𐴉𐴝𐴘𐴧𐴠𐴥𐴱𐴱

𐴁𐴝𐴚𐴓𐴝 𐴊𐴠𐴐𐴢| 𐴑𐴡𐴑𐴏𐴡 𐴁𐴝𐴎𐴝𐴌 | 𐴀𐴟𐴑𐴤𐴞𐴘𐴝 |𐴑𐴟𐴃𐴤𐴟𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 ( 𐴱 𐴋𐴝𐴁𐴡𐴓𐴘𐴟𐴃𐴢) 𐴋𐴞𐴎𐴝𐴔𐴁𐴝𐴌 𐴔𐴝𐴐𐴤𐴡𐴌 𐴲𐴴 𐴃𐴝𐴌𐴥𐴞𐴑 𐴱𐴲 𐴄𐴤𐴝 𐴁𐴝𐴎𐴤𐴠 𐴀𐴦𐴡𐴙𐴕 𐴊𐴤𐴡𐴌𐴥𐴞 𐴓𐴝𐴒𐴝𐴃𐴝𐴌 𐴀𐴠𐴑 𐴒𐴤𐴡𐴣𐴕𐴋𐴤𐴝𐴌 𐴖𐴡𐴌𐴠 𐴁𐴞𐴐𐴤𐴞 𐴏𐴥𐴡𐴑𐴃𐴡 𐴒𐴡𐴌𐴥𐴞 𐴎𐴡𐴓𐴝𐴃𐴢 𐴀𐴝𐴙𐴐𐴧𐴞𐴤𐴓𐴢 𐴁𐴡𐴓𐴞 𐴑𐴠𐴀𐴠𐴔𐴡𐴃𐴧𐴟𐴤 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴥 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴀𐴦𐴡𐴙𐴕 𐴊𐴡𐴙𐴅𐴧𐴙𐴤𐴠 𐴊𐴠 𐴇𐴥𐴠𐴍𐴠 𐴷𐴰𐴰 𐴐𐴤𐴡𐴃𐴢 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓𐴢 𐴉𐴟𐴌𐴞 𐴒𐴞𐴘𐴧𐴡𐴥𐴘 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴀𐴞𐴏𐴑𐴟𐴓𐴢 𐴲 𐴘𐴥𐴝𐴘 𐴉𐴟𐴌𐴞 𐴒𐴞𐴘𐴧𐴡𐴥𐴘 | 𐴔𐴡𐴏𐴥𐴡𐴙𐴃𐴢 𐴲 𐴘𐴥𐴝𐴘 |(𐴀𐴠𐴑 𐴅𐴤𐴞 𐴖𐴡𐴌) 𐴀𐴡𐴉𐴞𐴥𐴏𐴢 𐴲 𐴘𐴥𐴝𐴕 𐴓𐴟𐴏𐴧𐴝𐴕 𐴀𐴥𐴡𐴘 𐴒𐴞𐴘𐴧𐴡𐴥𐴘 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴸 𐴁𐴡𐴏𐴥𐴡𐴙𐴅𐴧𐴝 𐴒𐴟𐴌𐴝 𐴉𐴟𐴖𐴝 𐴀𐴟𐴒𐴧𐴗𐴤𐴝 𐴀𐴝𐴌 𐴀𐴠𐴑 𐴎𐴡𐴕 𐴶𐴴 𐴁𐴡𐴏𐴥𐴡𐴙𐴅𐴧𐴝 𐴁𐴟𐴌𐴝 𐴔𐴝𐴕𐴟𐴥𐴙𐴐𐴢 𐴀𐴦𐴡𐴙𐴕𐴡𐴃𐴢 𐴉𐴟𐴌𐴞 𐴒𐴞𐴘𐴧𐴡𐴥𐴘 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴱𐴹 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴦𐴡𐴙𐴕𐴡𐴃𐴢 𐴎𐴡𐴈𐴡𐴥𐴔 𐴉𐴝𐴘𐴧𐴠𐴥 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴑𐴟𐴃𐴤𐴟𐴉𐴝𐴓𐴡𐴚 𐴑𐴠𐴀𐴠𐴔 ( 𐴱 𐴋𐴝𐴁𐴡𐴓𐴘𐴟) | 𐴁𐴡𐴓𐴡𐴑 ( 𐴏𐴞 𐴱| 𐴏𐴞 𐴲 | 𐴏𐴞 𐴳| 𐴏𐴞 𐴴 | 𐴏𐴞 𐴵 ) 𐴀𐴥𐴠 𐴁𐴡𐴓𐴡𐴑 𐴀𐴥𐴞𐴕𐴡𐴃𐴧𐴟𐴤 𐴳𐴶𐴵 𐴒𐴤𐴡𐴌 𐴉𐴟𐴌𐴞 𐴒𐴞𐴘𐴧𐴡𐴥𐴘| 𐴏𐴞 (𐴱) 𐴁𐴡𐴓𐴡𐴑𐴡𐴃𐴧𐴟𐴤 𐴱𐴰𐴰 𐴒𐴤𐴡𐴌 𐴉𐴟𐴌𐴞 𐴒𐴞𐴘𐴧𐴡𐴥𐴘 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴑𐴠𐴀𐴠𐴔 𐴀𐴞𐴕 𐴐𐴤𐴝𐴣𐴀𐴝𐴐𐴢 (𐴏𐴞 𐴀𐴝𐴘 𐴏𐴞) 𐴀𐴡𐴉𐴞𐴥𐴏𐴢 | 𐴀𐴝𐴌 𐴀𐴠𐴑𐴧𐴝𐴤𐴕 (𐴏𐴞 𐴀𐴝𐴌 𐴏𐴞) 𐴀𐴠𐴕 𐴅𐴤𐴞 𐴖𐴡𐴌 𐴀𐴡𐴉𐴞𐴥𐴏𐴢 𐴉𐴟𐴌𐴞 𐴒𐴞𐴘𐴧𐴡𐴥𐴘 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴁𐴡𐴓𐴡𐴑 ( 𐴏𐴞 𐴶 | 𐴏𐴞 𐴷 | 𐴋𐴤𐴞 𐴱| 𐴋𐴤𐴞 𐴲 | 𐴀𐴞 𐴱 | 𐴀𐴠𐴉𐴢 𐴷 ) 𐴀𐴥𐴠 𐴁𐴡𐴓𐴡𐴑 𐴀𐴥𐴞𐴀𐴞𐴕𐴡𐴃𐴧𐴟𐴤 𐴀𐴡𐴦𐴙𐴕 𐴕𐴞𐴉𐴝𐴘 𐴁𐴝𐴘𐴐𐴤𐴡𐴃𐴢 𐴱𐴵𐴰 𐴒𐴤𐴡𐴌 𐴓𐴡𐴃𐴞 𐴁𐴝𐴚𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴔𐴟𐴄𐴢 𐴁𐴠𐴒𐴧𐴟𐴤𐴕𐴠 𐴷𐴰𐴰 𐴐𐴤𐴡𐴃𐴢 𐴒𐴤𐴡𐴌 𐴓𐴡𐴃𐴞 𐴓𐴟𐴏𐴧𐴝𐴕 𐴀𐴡𐴘𐴧𐴠𐴥 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴉𐴟𐴌𐴞 𐴒𐴞𐴘𐴧𐴡𐴥𐴘 𐴊𐴠𐴀𐴠 𐴇𐴥𐴠𐴕𐴃𐴟𐴤 𐴳 𐴎𐴡𐴕 𐴒𐴟𐴌𐴝 𐴉𐴟𐴖𐴝𐴙𐴕 𐴈𐴥𐴝𐴣𐴎𐴞 𐴒𐴞𐴘𐴧𐴡𐴥𐴘 𐴊𐴠𐴀𐴠 𐴃𐴟𐴖𐴝𐴘 𐴕𐴡𐴀𐴡 𐴉𐴝𐴊𐴧𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴀𐴡𐴦𐴙𐴕 𐴊𐴤𐴡𐴌𐴥𐴞 𐴁𐴦𐴝𐴊𐴠 𐴋𐴤𐴝𐴑𐴡𐴃𐴧𐴟𐴤 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴀𐴝𐴌 𐴀𐴡𐴀𐴙𐴕 𐴕𐴞𐴉𐴝 𐴊𐴠𐴀𐴠 𐴁𐴡𐴓𐴡𐴕𐴄𐴤𐴞𐴘𐴝𐴌 𐴀𐴥𐴡𐴑𐴧𐴡𐴓𐴢 | 𐴀𐴡𐴦𐴙𐴕 𐴕𐴞𐴉𐴝 𐴊𐴠𐴀𐴠 𐴒𐴝𐴌𐴥𐴞 𐴲 𐴘𐴥𐴝𐴕 𐴁𐴠𐴒𐴧𐴟𐴤𐴕𐴠 𐴔𐴞𐴓𐴞 𐴀𐴠𐴑 𐴒𐴤𐴡𐴣𐴕𐴋𐴤𐴝𐴌 𐴖𐴡𐴌𐴠 𐴑𐴟𐴐𐴤𐴞𐴐𐴢 𐴒𐴡𐴌𐴡𐴕𐴡𐴌 𐴎𐴡𐴌𐴞𐴘𐴝 𐴀𐴡𐴀𐴙𐴕 𐴕𐴞𐴉𐴝𐴘 𐴉𐴝𐴙𐴅𐴧𐴙𐴤𐴠 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴀𐴡𐴦𐴙𐴕 𐴀𐴥𐴞𐴀𐴞𐴕 𐴊𐴡𐴙𐴅𐴧𐴙𐴤𐴠 𐴊𐴠𐴀𐴠 (𐴏𐴞 𐴀𐴝𐴌 𐴏𐴞)𐴀𐴠𐴕 𐴅𐴤𐴞 𐴖𐴡𐴌 𐴀𐴡𐴉𐴞𐴥𐴏𐴡𐴃𐴧𐴟𐴤 𐴑𐴤𐴝𐴀𐴝𐴌𐴟𐴕𐴡𐴌 𐴃𐴝𐴌 𐴐𐴤𐴡𐴀𐴡𐴄𐴢 𐴒𐴡𐴌𐴥𐴞 𐴀𐴡𐴦𐴙𐴕 𐴊𐴤𐴡𐴌𐴞 𐴓𐴟𐴏𐴧𐴝𐴕 𐴀𐴡𐴘𐴧𐴠𐴥 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥. 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴑𐴞 𐴑𐴞 𐴓𐴟𐴏𐴧𐴝𐴕 𐴀𐴡𐴘𐴧𐴠𐴥 𐴇𐴥𐴞𐴀𐴞𐴕 𐴃𐴝𐴊𐴝𐴌𐴝𐴃𐴢 𐴒𐴡𐴌𐴥𐴝𐴃𐴢 𐴀𐴝𐴏𐴥𐴠 𐴊𐴠𐴀𐴠 𐴎𐴝𐴕𐴝 𐴒𐴞𐴘𐴧𐴠𐴥𐴱𐴱