𐴒𐴝𐴎𐴧𐴝𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴒𐴤𐴞𐴕𐴡𐴃𐴢 𐴀𐴞𐴏𐴌𐴦𐴝𐴙𐴓𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴓𐴝𐴑𐴓𐴝𐴑 𐴏𐴡𐴗𐴊𐴝𐴤𐴕𐴞 𐴀𐴝𐴌 𐴉𐴥𐴞𐴓𐴥𐴞𐴏𐴃𐴞𐴕𐴞𐴌 𐴅𐴝𐴕 𐴈𐴡𐴃𐴡𐴌𐴝𐴱𐴱

 

𐴒𐴝𐴎𐴧𐴝𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴒𐴤𐴞𐴕𐴡𐴃𐴢 𐴀𐴞𐴏𐴌𐴦𐴝𐴙𐴓𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴓𐴝𐴑𐴓𐴝𐴑 𐴏𐴡𐴗𐴊𐴝𐴤𐴕𐴞 𐴀𐴝𐴌 𐴉𐴥𐴞𐴓𐴥𐴞𐴏𐴃𐴞𐴕𐴞𐴌 𐴅𐴝𐴕 𐴈𐴡𐴃𐴡𐴌𐴝𐴱𐴱

𐴑𐴡𐴗𐴔𐴞 𐴏𐴥𐴡𐴔𐴝𐴒𐴤𐴡𐴌 𐴏𐴞𐴑𐴞𐴘𐴟𐴌𐴞𐴄𐴞 𐴅𐴠𐴕𐴝𐴌𐴠𐴓 𐴀𐴝𐴕𐴃𐴟𐴕𐴞𐴘𐴟 𐴒𐴟𐴃𐴠𐴌𐴠𐴐𐴠 𐴈𐴡𐴘𐴧𐴠𐴥 𐴊𐴠،  𐴒𐴝𐴎𐴧𐴝𐴃𐴢 𐴓𐴝𐴑 𐴓𐴝𐴑 𐴏𐴡𐴗𐴊𐴝𐴤𐴕𐴞 𐴀𐴝𐴌 𐴉𐴥𐴞𐴓𐴞𐴥𐴏𐴃𐴞𐴕𐴞 𐴏𐴞𐴌𐴞𐴥𐴉𐴢 𐴁𐴟𐴀𐴟𐴔 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴕𐴡،  𐴁𐴡𐴓𐴑𐴠 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴃𐴝𐴌𐴒𐴥𐴠𐴄 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝،  𐴀𐴡𐴐𐴟𐴙𐴑𐴧𐴙𐴝 𐴔𐴝𐴕𐴥𐴟𐴙𐴐𐴧𐴞𐴕 𐴊𐴝𐴁𐴝𐴘 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴔𐴡𐴌𐴥𐴞 𐴎𐴡𐴕𐴡𐴌 𐴈𐴡𐴥𐴃𐴡𐴌𐴝 𐴀𐴝𐴏𐴥𐴠، 𐴀𐴝𐴕𐴃𐴟𐴕𐴞𐴘𐴟 𐴒𐴟𐴃𐴠𐴌𐴠𐴐𐴠 𐴀𐴟𐴖𐴝𐴓𐴋 𐴇𐴥𐴠𐴓 𐴑𐴝𐴗𐴕𐴏𐴠𐴓𐴡𐴌  𐴷𐴷 𐴓𐴡𐴔𐴁𐴤𐴡𐴌 𐴅𐴡𐴓𐴏𐴝 𐴔𐴝𐴎𐴠𐴤 𐴐𐴤𐴡𐴌𐴥𐴞𐴑 𐴀𐴝𐴐𐴧𐴞𐴤𐴓𐴊𐴠 𐴖𐴡𐴑𐴃𐴡𐴃𐴢، 𐴀𐴠𐴑𐴧𐴝𐴕 𐴁𐴤𐴞𐴋𐴞𐴘𐴟 𐴈𐴥𐴡𐴁𐴡𐴌𐴡𐴔𐴧𐴝𐴎𐴤𐴠 𐴈𐴡𐴘𐴧𐴠𐴥 𐴊𐴠 𐴁𐴡𐴓𐴞 𐴈𐴡𐴀𐴡𐴙𐴓 𐴊𐴠 𐴀𐴝𐴏𐴥𐴠،  𐴔𐴥𐴟𐴀𐴟𐴏𐴥𐴟𐴔𐴞 𐴌𐴡𐴊𐴢 𐴁𐴡𐴊𐴡𐴓 𐴀𐴡𐴙𐴃𐴠 𐴓𐴡𐴘 𐴒𐴡𐴌𐴥𐴞𐴁𐴞 𐴀𐴝𐴊𐴧𐴠 𐴓𐴝𐴌𐴝𐴘  𐴁𐴝𐴌𐴥𐴞 𐴎𐴡𐴕𐴡𐴌 𐴎𐴡𐴌𐴞𐴘𐴝، 𐴀𐴝𐴀𐴝𐴣𐴌𐴥𐴝𐴌 𐴊𐴟𐴕𐴘𐴝𐴘 𐴒𐴤𐴝𐴕 𐴀𐴠𐴑𐴧𐴝𐴕 𐴋𐴡𐴌 𐴔𐴡𐴏𐴞𐴁𐴡𐴃𐴡𐴃𐴢 𐴀𐴝𐴏𐴥𐴠، 𐴀𐴝𐴌 𐴎𐴡𐴃𐴡 𐴔𐴡𐴐𐴑𐴞𐴓𐴝𐴃𐴢 𐴂𐴠𐴀𐴠𐴐𐴢 𐴀𐴥𐴝𐴘𐴧𐴠 𐴀𐴥𐴠𐴃𐴡 𐴀𐴞𐴕𐴏𐴥𐴝𐴕𐴞 𐴏𐴠𐴇𐴥𐴠𐴃𐴡𐴌 𐴓𐴟𐴑𐴏𐴥𐴝𐴕𐴞 𐴀𐴥𐴡𐴌 𐴁𐴡𐴓𐴞 𐴈𐴡𐴘𐴧𐴠𐴥𐴱𐴱

𐴀𐴝𐴕𐴃𐴟𐴕𐴞𐴘𐴟 𐴒𐴟𐴃𐴠𐴌𐴠𐴐𐴠 𐴀𐴝𐴌𐴡 𐴏𐴥𐴝𐴉𐴢 𐴏𐴥𐴝𐴉𐴢 𐴎𐴝𐴕𐴝𐴘𐴧𐴠𐴥 𐴊𐴠 𐴑𐴞 𐴁𐴡𐴓𐴞 𐴈𐴡𐴘𐴓𐴠 ، 𐴏𐴦𐴟𐴊𐴝𐴕 𐴀𐴝𐴊𐴧𐴠 𐴒𐴝𐴎𐴧𐴝𐴌 𐴓𐴝𐴑 𐴓𐴝𐴑 𐴔𐴝𐴕𐴥𐴟𐴙𐴐𐴢 𐴏𐴞𐴌𐴞𐴥𐴉𐴢 𐴁𐴟𐴓𐴥𐴠𐴄𐴀𐴝𐴊𐴧𐴠 𐴁𐴟𐴀𐴟𐴔𐴡𐴌 𐴎𐴡𐴌𐴞𐴘𐴝 𐴔𐴡𐴗𐴃𐴡𐴌 𐴈𐴥𐴡𐴃𐴡𐴌𐴝 𐴀𐴝𐴏𐴥𐴠 𐴊𐴠 𐴇𐴥𐴠𐴕 𐴕𐴡𐴀𐴡، 𐴁𐴡𐴓𐴑𐴠 𐴎𐴡𐴈𐴔𐴞،𐴀𐴡𐴐𐴤𐴟𐴑 𐴀𐴝𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴒𐴤𐴞𐴕𐴡𐴃𐴢 𐴇𐴥𐴝𐴔𐴓𐴝 𐴒𐴡𐴌𐴡𐴕𐴡𐴌 𐴎𐴡𐴌𐴞𐴘𐴝 𐴀𐴥𐴡، 𐴔𐴡𐴗𐴃𐴡𐴌 𐴈𐴥𐴡𐴃𐴡𐴌𐴝 𐴀𐴝𐴏𐴥𐴠۔ 𐴒𐴤𐴟𐴃𐴠𐴌𐴠𐴏𐴠 𐴀𐴝𐴌𐴥𐴡 𐴎𐴟𐴌 𐴊𐴞𐴘𐴥𐴡𐴌𐴠 𐴈𐴡𐴘𐴧𐴠𐴥 𐴊𐴠 𐴑𐴞 𐴁𐴡𐴓𐴞 𐴇𐴡𐴙𐴓𐴠 𐴉𐴥𐴟𐴌𐴝 𐴊𐴟𐴕𐴞𐴘𐴝𐴘𐴃𐴢 𐴲𐴰 𐴔𐴞𐴓𐴞𐴘𐴡𐴕𐴡𐴃𐴧𐴟 𐴕𐴥𐴝𐴌𐴡 𐴁𐴠𐴐𐴤𐴞 𐴒𐴤𐴟𐴌𐴝 𐴉𐴟𐴖𐴥𐴝𐴙𐴕 𐴀𐴝𐴏𐴥𐴠، 𐴎𐴝𐴌𐴥𐴝𐴌𐴠 𐴌𐴞𐴒𐴟𐴓𐴝𐴌 𐴄𐴞𐴑𐴝 𐴊𐴞𐴘𐴝 𐴕𐴡𐴀𐴡 𐴎𐴝𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴏𐴞𐴑𐴞𐴘𐴟𐴌𐴞𐴄𐴞 𐴅𐴠𐴕𐴝𐴌𐴠𐴓𐴠 𐴀𐴝𐴌𐴥𐴡  𐴈𐴡𐴘𐴧𐴠𐴥 𐴊𐴠، 𐴀𐴝𐴓𐴡𐴔𐴞 𐴏𐴠𐴇𐴠𐴃𐴡𐴌 𐴎𐴤𐴞𐴔𐴧𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠،  𐴀𐴟𐴖𐴝𐴓𐴋 𐴇𐴥𐴠𐴓 𐴀𐴠𐴏𐴥𐴠𐴔𐴁𐴠𐴓𐴥𐴞 𐴀𐴥𐴡𐴘𐴧𐴠 𐴊𐴠 𐴀𐴟𐴒𐴧𐴗𐴤𐴝 𐴊𐴡𐴌𐴈𐴝𐴌𐴞 𐴃𐴡𐴕𐴎𐴞𐴔، 𐴎𐴤𐴞𐴁𐴤𐴝𐴘𐴠  𐴏𐴡𐴓𐴠𐴊𐴧𐴠 𐴀𐴥𐴠 𐴔𐴡𐴏𐴞𐴁𐴡𐴃𐴡𐴃𐴢 𐴔𐴝𐴎𐴤𐴠 𐴀𐴞𐴕𐴏𐴥𐴝𐴕𐴥𐴞 𐴈𐴥𐴠𐴊𐴔𐴡𐴃𐴡𐴓𐴧𐴝 𐴁𐴡𐴓𐴞 𐴃𐴡𐴘𐴝𐴌 𐴀𐴥𐴡𐴘𐴧𐴠۔ 𐴇𐴥𐴞𐴁𐴝𐴘𐴠 𐴀𐴝𐴌𐴥𐴡 𐴈𐴡𐴘𐴧𐴠𐴥 𐴊𐴠 𐴑𐴞 𐴁𐴡𐴓𐴞 𐴈𐴡𐴘𐴓𐴠 𐴀𐴟𐴖𐴝𐴓𐴋 𐴇𐴥𐴠𐴓 𐴑𐴝𐴗𐴕𐴏𐴥𐴞𐴓𐴠 𐴏𐴠𐴇𐴥𐴠𐴃𐴡𐴌 𐴁𐴡𐴀𐴡𐴃𐴢  𐴀𐴝𐴓𐴡𐴔𐴞 𐴏𐴠𐴓𐴠𐴕𐴅𐴡𐴌 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴡𐴕𐴡𐴃𐴢، 𐴀𐴝𐴌  𐴀𐴝𐴣𐴀𐴝𐴌𐴝𐴌𐴥𐴠 𐴀𐴞𐴕𐴄𐴝𐴌 𐴕𐴠𐴐𐴠𐴕𐴡𐴓 𐴀𐴠𐴏𐴄𐴌𐴝𐴑𐴐𐴟𐴌𐴡𐴃𐴧𐴟 𐴉𐴝𐴘𐴊𐴝 𐴇𐴦𐴝𐴏𐴠𐴓 𐴒𐴡𐴌𐴥𐴞 𐴁𐴝𐴌، 𐴀𐴝𐴌 𐴔𐴟𐴏𐴃𐴡𐴑𐴁𐴠𐴓𐴡𐴃𐴢 𐴈𐴡𐴕𐴥𐴡 𐴔𐴡𐴐𐴑𐴞𐴓 𐴀𐴥𐴡𐴘𐴧𐴠𐴊𐴠 𐴀𐴥𐴡𐴘𐴓𐴠 𐴇𐴥𐴞𐴘𐴝𐴕𐴡𐴌 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴞 𐴁𐴡𐴓𐴧𐴝 𐴁𐴡𐴓𐴞، 𐴎𐴡𐴌𐴟𐴌𐴞 𐴕𐴠𐴎𐴝𐴔 𐴀𐴥𐴡𐴑𐴧𐴡𐴓 𐴁𐴝𐴕𐴝𐴘𐴁𐴝𐴌 𐴔𐴡𐴖𐴑𐴝 𐴊𐴡𐴀𐴡𐴕𐴡𐴃𐴢 𐴕𐴡𐴔𐴝𐴙𐴕𐴊𐴝𐴒𐴞 𐴒𐴡𐴌𐴠𐴥𐴌𐴱𐴱