𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴖𐴋𐴝𐴌 𐴑𐴤𐴟𐴓𐴞 𐴊𐴞𐴁𐴡𐴓𐴧𐴝 𐴁𐴡𐴓𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴦𐴡𐴌𐴠 𐴀𐴝𐴌𐴠𐴑𐴁𐴝𐴌 𐴏𐴝𐴉𐴢𐴱𐴱

 

𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴖𐴋𐴝𐴌 𐴑𐴤𐴟𐴓𐴞 𐴊𐴞𐴁𐴡𐴓𐴧𐴝 𐴁𐴡𐴓𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴦𐴡𐴌𐴠 𐴀𐴝𐴌𐴠𐴑𐴁𐴝𐴌 𐴏𐴝𐴉𐴢𐴱𐴱

𐴀 2017 𐴐𐴤𐴡𐴕𐴡𐴃𐴢 𐴅𐴠𐴕𐴟𐴏𐴥𐴝𐴙𐴋𐴡𐴌 𐴐𐴤𐴞𐴑𐴝𐴌 𐴀𐴡𐴘𐴡𐴌𐴠 𐴁𐴡𐴌𐴔𐴥𐴝𐴌 𐴃𐴧𐴞 𐴊𐴤𐴝𐴘- 𐴊𐴦𐴟𐴣𐴌𐴞 10 𐴓𐴥𐴝𐴑𐴡𐴃𐴧𐴟𐴕𐴥𐴝𐴌𐴡 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴘𐴡𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴑𐴡𐴑𐴏 𐴁𐴝𐴎𐴝𐴌 𐴀𐴠𐴓𐴠𐴑𐴝𐴃𐴢 𐴔𐴝𐴎𐴤𐴠 𐴉𐴝𐴕𐴝 𐴓𐴡𐴘𐴧𐴠𐴥𐴊𐴠 𐴇𐴥𐴞𐴀𐴞𐴕𐴡𐴌𐴥𐴠. 𐴀𐴝𐴌𐴠𐴑𐴁𐴝𐴌 𐴀𐴝𐴌𐴑𐴝𐴕𐴡𐴃 𐴖𐴝𐴉𐴠𐴏𐴢 𐴓𐴡𐴘𐴎𐴤𐴝𐴘 𐴁𐴡𐴓𐴧𐴝 𐴁𐴡𐴓𐴞 𐴁𐴡𐴌𐴔𐴥𐴝𐴌 𐴇𐴡𐴑𐴟𐴔𐴡𐴃𐴢 𐴀𐴠𐴊𐴧𐴠 𐴁𐴝𐴚𐴓𐴝𐴊𐴠𐴐𐴢 𐴔𐴞𐴓𐴞𐴘𐴡𐴌𐴥𐴠 𐴔𐴟𐴀𐴝𐴇𐴠𐴊𐴝 𐴒𐴡𐴌𐴥𐴞 𐴓𐴞𐴘𐴡 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴀𐴠𐴑𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 𐴘𐴡 𐴖𐴝𐴉𐴠𐴏𐴢 𐴕𐴡𐴀𐴡 𐴓𐴞𐴎𐴝𐴱𐴱

𐴁𐴡𐴓𐴑𐴠 𐴀𐴠𐴈𐴥𐴡𐴕 𐴀𐴝𐴌𐴥𐴡 𐴇𐴡𐴘𐴠𐴑 𐴇𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴡𐴘𐴝 𐴒𐴡𐴌𐴥𐴞 𐴁𐴝𐴚𐴓𐴝𐴊𐴠𐴐𐴤𐴡𐴃𐴢 𐴒𐴡𐴓𐴞 𐴁𐴡𐴓𐴧𐴝 𐴁𐴡𐴓𐴞 𐴁𐴡𐴖𐴋𐴝𐴌 𐴀𐴠𐴓𐴝𐴑𐴝𐴃𐴢 𐴔𐴝𐴎𐴤𐴠 𐴀𐴠𐴕𐴃𐴠𐴎𐴝𐴌𐴡𐴃𐴢 𐴀𐴝𐴏𐴥𐴠، 𐴎𐴞𐴀𐴞𐴕𐴡𐴌𐴥𐴠 𐴒𐴡𐴓𐴝𐴘𐴁𐴡𐴓𐴧𐴝 𐴕𐴠𐴑𐴞 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴐𐴡𐴀𐴡 𐴀𐴝𐴌𐴥𐴡 𐴈𐴡𐴀𐴠𐴑𐴧𐴝𐴕 𐴊𐴠𐴐𐴠 𐴀𐴞𐴕𐴄𐴝𐴌𐴕𐴠𐴐𐴠𐴕𐴝𐴓𐴧𐴞 𐴁𐴝𐴉𐴠 𐴎𐴟𐴀𐴟𐴌 𐴒𐴡𐴌𐴠𐴥𐴌 𐴱𐴱

𐴎𐴞𐴘𐴝𐴕𐴡𐴌 𐴎𐴡𐴌𐴞𐴘𐴝 𐴒𐴡𐴃𐴡 𐴌𐴦𐴡𐴘𐴁𐴝𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴇𐴡𐴑𐴟𐴔𐴡𐴃𐴡𐴌 𐴀𐴠𐴑 𐴏𐴞𐴕𐴞𐴘𐴝𐴌 𐴀𐴡𐴉𐴞𐴏𐴥𐴝𐴌𐴠 𐴀𐴠 𐴈𐴡𐴃𐴤𐴝 𐴒𐴤𐴝𐴕𐴡𐴌𐴠 𐴃𐴟𐴓𐴞 𐴊𐴤𐴡𐴌𐴞 𐴘𐴡𐴌𐴠 𐴀𐴡𐴐𐴝𐴕𐴃𐴞 𐴒𐴡𐴌𐴥𐴞 𐴈𐴡𐴀𐴡𐴙𐴊𐴧𐴠، 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴓𐴡𐴘 𐴓𐴡𐴘 𐴃𐴤𐴝𐴘𐴁𐴡𐴓𐴧𐴝 𐴁𐴡𐴓𐴞 𐴁𐴝𐴌 𐴁𐴝𐴌 𐴀𐴝𐴣𐴀𐴝𐴌𐴝𐴌𐴥𐴠 𐴏𐴝𐴉𐴢 𐴊𐴞𐴘𐴝𐴃𐴢 𐴃𐴤𐴝𐴘𐴓𐴠 𐴑𐴠𐴀𐴠𐴕 𐴀𐴥𐴡𐴘𐴁𐴡. 𐴁𐴡𐴌𐴔𐴥𐴝𐴌 𐴓𐴧𐴡𐴘 𐴁𐴝𐴎𐴝𐴘𐴝 𐴀𐴝𐴌𐴥𐴡 𐴀𐴞𐴕𐴋𐴞𐴘𐴝، 𐴆𐴞𐴕𐴝، 𐴄𐴝𐴘𐴓𐴠𐴕، 𐴓𐴝𐴀𐴡𐴏𐴢 𐴏𐴝𐴙𐴌 𐴒𐴝𐴕 𐴊𐴠𐴐𐴤𐴡𐴌 𐴐𐴤𐴞𐴔𐴝 𐴀𐴝𐴏𐴥𐴠. 𐴓𐴠𐴑𐴞𐴕 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴐𐴡𐴀𐴡 𐴀𐴝𐴌𐴥𐴡 𐴊𐴠𐴐𐴢 𐴒𐴤𐴞𐴕𐴠 𐴁𐴡𐴖𐴋𐴝𐴌 𐴑𐴤𐴟𐴓𐴞 𐴊𐴞 𐴁𐴡𐴓𐴧𐴝 𐴁𐴡𐴓𐴞 𐴏𐴞𐴌𐴞𐴉𐴢 𐴁𐴝𐴚𐴓𐴝𐴊𐴠𐴐𐴤𐴡𐴌𐴠 𐴑𐴤𐴞𐴘𐴝 𐴈𐴡𐴀𐴡 𐴀𐴝𐴌 𐴀𐴡𐴙𐴕𐴧𐴡 𐴊𐴠𐴐𐴤𐴡𐴌 𐴕𐴝𐴔 𐴑𐴝 𐴕𐴡 𐴊𐴡𐴌𐴡𐴌𐴱𐴱

𐴀𐴝𐴌𐴑𐴝𐴕𐴡𐴌 𐴁𐴞𐴁𐴞𐴕𐴧𐴡 𐴀𐴠𐴓𐴝𐴑𐴝 𐴀𐴥𐴡𐴑𐴧𐴡𐴓𐴡𐴃𐴧𐴞 𐴀𐴦𐴝𐴘𐴡𐴌𐴥𐴠 𐴀𐴠𐴈𐴡𐴕𐴥𐴡 𐴃𐴡𐴑𐴌𐴞𐴁𐴝𐴕 𐴴𐴵 𐴇𐴝𐴎𐴝𐴌 𐴉𐴥𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴖𐴋𐴝𐴌 𐴀𐴠𐴓𐴝𐴑𐴝𐴃𐴢 𐴔𐴝𐴎𐴤𐴠 𐴉𐴝𐴕𐴝 𐴓𐴡𐴘𐴧𐴠. 𐴀𐴠 𐴈𐴡𐴃𐴤𐴝 𐴒𐴝𐴕 𐴎𐴝𐴕𐴝𐴘 𐴊𐴞𐴘𐴡𐴌𐴥𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴇𐴥𐴝𐴘 𐴑𐴡𐴔𐴞𐴐𐴡𐴕𐴝𐴓 𐴁𐴡𐴓𐴑𐴝𐴌 𐴃𐴟𐴌𐴑𐴞 𐴘𐴠. 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴝𐴌𐴠𐴑𐴁𐴝𐴌 𐴕𐴡𐴘𐴝 𐴒𐴡𐴌𐴥𐴞 𐴁𐴝𐴚𐴓𐴝𐴊𐴠𐴐𐴤𐴡𐴃𐴢 𐴒𐴡𐴓𐴝𐴘 𐴁𐴡𐴓𐴧𐴝 𐴁𐴡𐴓𐴞 𐴀𐴝𐴉𐴞𐴓 𐴒𐴡𐴙𐴅𐴧𐴙𐴠𐴱𐴱