ရန်ကုန်တိုင်းဒေသကြီး၊ အင်းစိန်မြို့နယ်၊ မြို့သစ်(က/ခ) ရပ်ကွက်၊ (ခ/၉)လမ်းတွင် နိုဝင်ဘာ ၁၈ ရက်၊ ည ၇ နာရီခွဲအချိန်ခန့်က မီးလောင်ကျွမ်းမှု တစ်ခုဖြစ်ပွားခဲ့ကြောင်း မီးသတ်တပ်ဖွဲ့နှင့် သွားရောက်ကူညီခဲ့သည့် လူမှုကူညီရေးအဖွဲ့များထံမှ သိရသည်။
အင်းစိန်မြို့နယ်၊ မြို့သစ်(က/ခ)ရပ်ကွက်၊ (ခ/၉)လမ်းရှိ နေအိမ်တစ်အိမ်တွင် မီးလောင်မှု ဖြစ်ပွားကြောင်း သတင်းအရ မီးသတ်တပ်ဖွဲ့မှ level 1 ယာဉ်အုပ်စု ထွက်ခွာငြှိမ်းသတ်ခဲ့ရကြောင်း သိရသည်။
ထိုသို့ ငြှိမ်းသတ်ရာ ည ၇ နာရီ ၄၃ မိနစ်အချိန်တွင် မီးထိန်းနိုင်ခဲ့ပြီး ည ၇ နာရီ ၅၀ မိနစ်အချိန်တွင် မီးငြှိမ်းသတ်နိုင်ခဲ့ကြောင်း သိရသည်။
အဆိုပါ မီးလောင်မှုကို တွဲလက်လူမှုကူညီရေးအဖွဲ့မှ ထွက်ခွာကူညီခဲ့ပြီး ဒဏ်ရာရရှိသူများအား ရှေးဦးပြုစု၍ ဘေးလွတ်ရာသို့ ကူညီပို့ဆောင်ပေးခဲ့ကြောင်း သိရသည်။
မီးလောင်ကျွမ်းမှုဖြစ်စဉ် အကြောင်းရင်း အသေးစိတ်နှင့် ပျက်စီးဆုံးရှုံးမှု တန်ဖိုးအား မီးသတ်တပ်ဖွဲ့ တာဝန်ရှိသူများက စစ်ဆေးလျက်ရှိကြောင်း သိရသည်။