မြန်မာနိုင်ငံအတွင်း ဖြစ်ပေါ်နေတဲ့ ပဋိပက္ခတွေဟာ အာဆီယံအဖွဲ့အတွက် ကိုင်တွယ်ဖြေရှင်းဖို့ ခက်ခဲတဲ့ပြဿနာဖြစ်ပြီး အရှိန်မြင့် ဖြစ်ပေါ်လာနေတဲ့ တိုက်ပွဲတွေတိုက်ပွဲတွေ အဆုံးသတ်ရေးကို ဦးတည်စေတဲ့ တိုးတက်မှုမရနိုင်ဘဲ ဖြစ်နေတယ်လို့ ဖိလစ်ပိုင်သမ္မတ Ferdinand Marcos Jr. က ဒီကနေ့ ပြောကြားလိုက်ပါတယ်။
အာဆီယံအနေနဲ့ မြန်မာ့အရေးကို ကိုင်တွယ်ဖြေရှင်းဖို့ သံန္နိဌာန်ချထားပေမယ့် မြန်မာပဋိပက္ခဟာ ခက်ခဲ ရှုပ်ထွေးလွန်းတယ်လို့ အမေရိကန်ပြည်ထောင်စု၊ Hawaii ပြည်နယ်မှာပြုလုပ်တဲ့ ညီလာခံတခုအတွင်း သမ္မတ Marcos Jr. က ထည့်သွင်း ပြောကြားခဲ့တာပါ။
မြန်မာ့အရေးကိုဖြေရှင်းဖို့အတွက် အာဆီယံအပေါ် ဖိအားပေးမှုတွေရှိပေမဲ့ ဒီကိစ္စဟာ အင်မတန်ခက်ခဲတဲ့ကိစ္စဖြစ်တယ်လို့ ဖိလစ်ပိုင်သမ္မတက ပြောပါတယ်။ မကြာသေးခင်သီတင်းပတ်တွေအတွင်း ထွက်ပေါ်လာတဲ့ သတင်းအချက်အလက်တွေအရ စစ်ကောင်စီဟာ သူ့တပ်ဖွဲ့ဝင်တွေရဲ့ ထောက်ခံမှု ကျဆင်းလာနေတယ်လို့လည်း သမ္မတ Marcos Jr. က ပြောပါတယ်။
မြန်မာနိုင်ငံမှာ စစ်တပ်က အာဏာသိမ်းလိုက်တဲ့ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့စကလို့ ပြည်တွင်း နေရပ်စွန့်ခွာ ထွက်ပြေးရသူ တသန်းကျော် ရှိသွားပြီဖြစ်ကြောင်း ကုလသမဂ္ဂကလည်း သတင်းထုတ်ပြန်ထားပါတယ်။
ဖိလစ်ပိုင်ဟာ လာမယ့် ၂၀၂၆ ခုနှစ်မှာ မြန်မာနိုင်ငံအစား အာဆီယံအဖွဲ့ရဲ့ အလှည့်ကျဥက္ကဌအဖြစ် အစားထိုး တာဝန်ယူမှာ ဖြစ်ပါတယ်။